Muaj khib nyiab ntau heev nyob hauv tus niam dej Bosnia, nws yog teeb meem raws lub caij nyoog uas cov neeg tawm tsam xav txwv txiav
Lub caij uas pom khib nyiab ntau ntau nyob hauv tus niam dej, mas yog ib xyoos 2 zaug. Thiab cov khib nyiab ntawd yuav nrog dej ntws mus xaus rau lub nroog Visegrad uas nyob sab hnub tuaj hauv Bosnia. Nyob tom qab sab phab ntsa thaiv dej uas txhim los ntawm lub tuam tsev tsim hluav taws xob hauv lub zos.
Cov khib nyiab uas neeg pov tseg tsis raug cai, muaj nyob puv tas ntug hiav txwv Balkans sab hnub poob. Nws raug tus niam dej Drina tshoob mus los tas niaj tas xyoo mus txog cov niam dej nyob hauv Bosnia, nyob Serbia, nyob Montenegro mus txog lub nroog Visegrad. Mus txog rau tus niam dej Danube thiab qhov kawg tus niam dej Danube kuj yuav tshoob mus.
Tab sis thaum lub caij ntuj no thiab pib lub caij nplooj ntoos hlav, cov dej ib cheeb tsam ntawd yuav huam loj thiab tshoob cov khib nyiab ntau ntau mus faus mus khuam rau ntau ntu dej ntiav ntiav. Thiab nws ntws tsis dhau sab phab ntsa zeb thaiv dej uas lub tuam tsev tsim hluav taws xob Bosnia txhim. Ua rau sab phab ntsa ntawd muaj tej khib nyiab khuam ntev li 2-3 km, thiab nyob txog 2-3 lub lis piam. Nyob ntawd muaj hnab roj hmab, lam hwj roj hmab, tej toob xib roj hmab uas tsis siv lawm, lauj kaub tais diav qub qub, tog xyoob tog ntoo, tsiaj tuag thiab lwm yam nyob puv ntia qhov txhia chaw. Qhov nov ua kom pom txog tseem hwv txoj kev tiv thaiv khib nyiab thiab kev saib xyuas txhua yam nyob ib puag ncig zoo tsis txaus.
